Over de grup, streektaolfestival in dreei deeilen
Vleden jaor hew in de maande met Stichting Kostverloren oet Grunnegerlaand en de Heimatverein oet Leer dreei kovviemörgens organiseerd. Der kwamen een koppel mèensen of op de kwalitatief goeie pregramma’s en de reacties van ’t volk waren slim positief. Dat, de dreei organisaotsies hebben besloten dat der in 2006 weer dreei kovviemörgens organiseerd worden moeten met literatuur, meziek en eterij. Van ’t jaor zal de naodruk bij ’t eten liggen op streekproducten.
We begunnen net as veurig jaor in ’t Klottjehuus in Leer op zundag 9 april, met onder andern dichteres Suze Sanders en meziek van De Fiebeldekwinten. Op 23 april gaow op vesite in Huize Bareveld in Nieuwediep an de N33 op de grèens van Grunning en Drenthe. Daor zal een optreden weden van de stadsdichter van Assen, Erik Harteveld en van de Oost-Freeise muzikant Lutz Holler. Nao de pauze kriew Dinner for One op zien Plattduuts. ’t Mooiste hew vanzölf veur ’t lest bewaord, as Stichting Drentse Taol op zundag 21 mei in Drenthe de gastheer speulen mag bij café Hofsteenge in Grolloo. Henk Puister, schriever van prachtige Grunneger verhaolen en gedichten komp veurlezen. De Drèentse bijdraoges kommen van Jan Veenstra en Marga Kool, de meziek is van Geert Jan Brader.
Aj kaorten veur eein van dizze kovviemörgens bestellen willen, kuj bellen of mailen met Stichting Drentse Taol, 0592-381173, a.darwinkel@pbcdrenthe.nl.
